[ଶ୍ରୀମଦ୍ଭଗଵଦ୍ଗୀତା] ᐈ (Chapter 11) Srimad Bhagavad Gita Lyrics In Oriya/Odia Pdf

Srimad Bhagavad Gita Chapter 11 Lyrics In Oriya/Odia

ଅଥ ଏକାଦଶୋଽଧ୍ୟାୟଃ ।

ଅର୍ଜୁନ ଉଵାଚ ।
ମଦନୁଗ୍ରହାୟ ପରମଂ ଗୁହ୍ୟମଧ୍ୟାତ୍ମସଂଜ୍ଞିତମ୍ ।
ୟତ୍ତ୍ଵୟୋକ୍ତଂ ଵଚସ୍ତେନ ମୋହୋଽୟଂ ଵିଗତୋ ମମ ॥ 1 ॥

ଭଵାପ୍ୟୟୌ ହି ଭୂତାନାଂ ଶ୍ରୁତୌ ଵିସ୍ତରଶୋ ମୟା ।
ତ୍ଵତ୍ତଃ କମଲପତ୍ରାକ୍ଷ ମାହାତ୍ମ୍ୟମପି ଚାଵ୍ୟୟମ୍ ॥ 2 ॥

ଏଵମେତଦ୍ୟଥାତ୍ଥ ତ୍ଵମାତ୍ମାନଂ ପରମେଶ୍ଵର ।
ଦ୍ରଷ୍ଟୁମିଚ୍ଛାମି ତେ ରୂପମୈଶ୍ଵରଂ ପୁରୁଷୋତ୍ତମ ॥ 3 ॥

ମନ୍ୟସେ ୟଦି ତଚ୍ଛକ୍ୟଂ ମୟା ଦ୍ରଷ୍ଟୁମିତି ପ୍ରଭୋ ।
ୟୋଗେଶ୍ଵର ତତୋ ମେ ତ୍ଵଂ ଦର୍ଶୟାତ୍ମାନମଵ୍ୟୟମ୍ ॥ 4 ॥

ଶ୍ରୀଭଗଵାନୁଵାଚ ।
ପଶ୍ୟ ମେ ପାର୍ଥ ରୂପାଣି ଶତଶୋଽଥ ସହସ୍ରଶଃ ।
ନାନାଵିଧାନି ଦିଵ୍ୟାନି ନାନାଵର୍ଣାକୃତୀନି ଚ ॥ 5 ॥

ପଶ୍ୟାଦିତ୍ୟାନ୍ଵସୂନ୍ରୁଦ୍ରାନଶ୍ଵିନୌ ମରୁତସ୍ତଥା ।
ବହୂନ୍ୟଦୃଷ୍ଟପୂର୍ଵାଣି ପଶ୍ୟାଶ୍ଚର୍ୟାଣି ଭାରତ ॥ 6 ॥

ଇହୈକସ୍ଥଂ ଜଗତ୍କୃତ୍ସ୍ନଂ ପଶ୍ୟାଦ୍ୟ ସଚରାଚରମ୍ ।
ମମ ଦେହେ ଗୁଡାକେଶ ୟଚ୍ଚାନ୍ୟଦ୍ଦ୍ରଷ୍ଟୁମିଚ୍ଛସି ॥ 7 ॥

ନ ତୁ ମାଂ ଶକ୍ୟସେ ଦ୍ରଷ୍ଟୁମନେନୈଵ ସ୍ଵଚକ୍ଷୁଷା ।
ଦିଵ୍ୟଂ ଦଦାମି ତେ ଚକ୍ଷୁଃ ପଶ୍ୟ ମେ ୟୋଗମୈଶ୍ଵରମ୍ ॥ 8 ॥

ସଂଜୟ ଉଵାଚ ।
ଏଵମୁକ୍ତ୍ଵା ତତୋ ରାଜନ୍ମହାୟୋଗେଶ୍ଵରୋ ହରିଃ ।
ଦର୍ଶୟାମାସ ପାର୍ଥାୟ ପରମଂ ରୂପମୈଶ୍ଵରମ୍ ॥ 9 ॥

ଅନେକଵକ୍ତ୍ରନୟନମନେକାଦ୍ଭୁତଦର୍ଶନମ୍ ।
ଅନେକଦିଵ୍ୟାଭରଣଂ ଦିଵ୍ୟାନେକୋଦ୍ୟତାୟୁଧମ୍ ॥ 10 ॥

ଦିଵ୍ୟମାଲ୍ୟାଂବରଧରଂ ଦିଵ୍ୟଗଂଧାନୁଲେପନମ୍ ।
ସର୍ଵାଶ୍ଚର୍ୟମୟଂ ଦେଵମନଂତଂ ଵିଶ୍ଵତୋମୁଖମ୍ ॥ 11 ॥

ଦିଵି ସୂର୍ୟସହସ୍ରସ୍ୟ ଭଵେଦ୍ୟୁଗପଦୁତ୍ଥିତା ।
ୟଦି ଭାଃ ସଦୃଶୀ ସା ସ୍ୟାଦ୍ଭାସସ୍ତସ୍ୟ ମହାତ୍ମନଃ ॥ 12 ॥

ତତ୍ରୈକସ୍ଥଂ ଜଗତ୍କୃତ୍ସ୍ନଂ ପ୍ରଵିଭକ୍ତମନେକଧା ।
ଅପଶ୍ୟଦ୍ଦେଵଦେଵସ୍ୟ ଶରୀରେ ପାଂଡଵସ୍ତଦା ॥ 13 ॥

ତତଃ ସ ଵିସ୍ମୟାଵିଷ୍ଟୋ ହୃଷ୍ଟରୋମା ଧନଂଜୟଃ ।
ପ୍ରଣମ୍ୟ ଶିରସା ଦେଵଂ କୃତାଂଜଲିରଭାଷତ ॥ 14 ॥

ଅର୍ଜୁନ ଉଵାଚ ।
ପଶ୍ୟାମି ଦେଵାଂସ୍ତଵ ଦେଵ ଦେହେ ସର୍ଵାଂସ୍ତଥା ଭୂତଵିଶେଷସଂଘାନ୍।
ବ୍ରହ୍ମାଣମୀଶଂ କମଲାସନସ୍ଥମୃଷୀଂଶ୍ଚ ସର୍ଵାନୁରଗାଂଶ୍ଚ ଦିଵ୍ୟାନ୍ ॥ 15 ॥

ଅନେକବାହୂଦରଵକ୍ତ୍ରନେତ୍ରଂ ପଶ୍ୟାମି ତ୍ଵାଂ ସର୍ଵତୋଽନଂତରୂପମ୍।
ନାଂତଂ ନ ମଧ୍ୟଂ ନ ପୁନସ୍ତଵାଦିଂ ପଶ୍ୟାମି ଵିଶ୍ଵେଶ୍ଵର ଵିଶ୍ଵରୂପ ॥ 16 ॥

କିରୀଟିନଂ ଗଦିନଂ ଚକ୍ରିଣଂ ଚ ତେଜୋରାଶିଂ ସର୍ଵତୋ ଦୀପ୍ତିମଂତମ୍।
ପଶ୍ୟାମି ତ୍ଵାଂ ଦୁର୍ନିରୀକ୍ଷ୍ୟଂ ସମଂତାଦ୍ଦୀପ୍ତାନଲାର୍କଦ୍ୟୁତିମପ୍ରମେୟମ୍ ॥ 17 ॥

ତ୍ଵମକ୍ଷରଂ ପରମଂ ଵେଦିତଵ୍ୟଂ ତ୍ଵମସ୍ୟ ଵିଶ୍ଵସ୍ୟ ପରଂ ନିଧାନମ୍।
ତ୍ଵମଵ୍ୟୟଃ ଶାଶ୍ଵତଧର୍ମଗୋପ୍ତା ସନାତନସ୍ତ୍ଵଂ ପୁରୁଷୋ ମତୋ ମେ ॥ 18 ॥

ଅନାଦିମଧ୍ୟାଂତମନଂତଵୀର୍ୟମନଂତବାହୁଂ ଶଶିସୂର୍ୟନେତ୍ରମ୍।
ପଶ୍ୟାମି ତ୍ଵାଂ ଦୀପ୍ତହୁତାଶଵକ୍ତ୍ରଂ ସ୍ଵତେଜସା ଵିଶ୍ଵମିଦଂ ତପଂତମ୍ ॥ 19 ॥

ଦ୍ୟାଵାପୃଥିଵ୍ୟୋରିଦମଂତରଂ ହି ଵ୍ୟାପ୍ତଂ ତ୍ଵୟୈକେନ ଦିଶଶ୍ଚ ସର୍ଵାଃ।
ଦୃଷ୍ଟ୍ଵାଦ୍ଭୁତଂ ରୂପମୁଗ୍ରଂ ତଵେଦଂ ଲୋକତ୍ରୟଂ ପ୍ରଵ୍ୟଥିତଂ ମହାତ୍ମନ୍ ॥ 20 ॥

ଅମୀ ହି ତ୍ଵାଂ ସୁରସଂଘା ଵିଶଂତି କେଚିଦ୍ଭୀତାଃ ପ୍ରାଂଜଲୟୋ ଗୃଣଂତି।
ସ୍ଵସ୍ତୀତ୍ୟୁକ୍ତ୍ଵା ମହର୍ଷିସିଦ୍ଧସଂଘାଃ ସ୍ତୁଵଂତି ତ୍ଵାଂ ସ୍ତୁତିଭିଃ ପୁଷ୍କଲାଭିଃ ॥ 21 ॥

ରୁଦ୍ରାଦିତ୍ୟା ଵସଵୋ ୟେ ଚ ସାଧ୍ୟା ଵିଶ୍ଵେଽଶ୍ଵିନୌ ମରୁତଶ୍ଚୋଷ୍ମପାଶ୍ଚ।
ଗଂଧର୍ଵୟକ୍ଷାସୁରସିଦ୍ଧସଂଘା ଵୀକ୍ଷଂତେ ତ୍ଵାଂ ଵିସ୍ମିତାଶ୍ଚୈଵ ସର୍ଵେ ॥ 22 ॥

ରୂପଂ ମହତ୍ତେ ବହୁଵକ୍ତ୍ରନେତ୍ରଂ ମହାବାହୋ ବହୁବାହୂରୁପାଦମ୍।
ବହୂଦରଂ ବହୁଦଂଷ୍ଟ୍ରାକରାଲଂ ଦୃଷ୍ଟ୍ଵା ଲୋକାଃ ପ୍ରଵ୍ୟଥିତାସ୍ତଥାହମ୍ ॥ 23 ॥

ନଭଃସ୍ପୃଶଂ ଦୀପ୍ତମନେକଵର୍ଣଂ ଵ୍ୟାତ୍ତାନନଂ ଦୀପ୍ତଵିଶାଲନେତ୍ରମ୍।
ଦୃଷ୍ଟ୍ଵା ହି ତ୍ଵାଂ ପ୍ରଵ୍ୟଥିତାଂତରାତ୍ମା ଧୃତିଂ ନ ଵିଂଦାମି ଶମଂ ଚ ଵିଷ୍ଣୋ ॥ 24 ॥

ଦଂଷ୍ଟ୍ରାକରାଲାନି ଚ ତେ ମୁଖାନି ଦୃଷ୍ଟ୍ଵୈଵ କାଲାନଲସଂନିଭାନି।
ଦିଶୋ ନ ଜାନେ ନ ଲଭେ ଚ ଶର୍ମ ପ୍ରସୀଦ ଦେଵେଶ ଜଗନ୍ନିଵାସ ॥ 25 ॥

ଅମୀ ଚ ତ୍ଵାଂ ଧୃତରାଷ୍ଟ୍ରସ୍ୟ ପୁତ୍ରାଃ ସର୍ଵେ ସହୈଵାଵନିପାଲସଂଘୈଃ।
ଭୀଷ୍ମୋ ଦ୍ରୋଣଃ ସୂତପୁତ୍ରସ୍ତଥାସୌ ସହାସ୍ମଦୀୟୈରପି ୟୋଧମୁଖ୍ୟୈଃ ॥ 26 ॥

ଵକ୍ତ୍ରାଣି ତେ ତ୍ଵରମାଣା ଵିଶଂତି ଦଂଷ୍ଟ୍ରାକରାଲାନି ଭୟାନକାନି।
କେଚିଦ୍ଵିଲଗ୍ନା ଦଶନାଂତରେଷୁ ସଂଦୃଶ୍ୟଂତେ ଚୂର୍ଣିତୈରୁତ୍ତମାଂଗୈଃ ॥ 27 ॥

ୟଥା ନଦୀନାଂ ବହଵୋଽଂବୁଵେଗାଃ ସମୁଦ୍ରମେଵାଭିମୁଖା ଦ୍ରଵଂତି।
ତଥା ତଵାମୀ ନରଲୋକଵୀରା ଵିଶଂତି ଵକ୍ତ୍ରାଣ୍ୟଭିଵିଜ୍ଵଲଂତି ॥ 28 ॥

ୟଥା ପ୍ରଦୀପ୍ତଂ ଜ୍ଵଲନଂ ପତଂଗା ଵିଶଂତି ନାଶାୟ ସମୃଦ୍ଧଵେଗାଃ।
ତଥୈଵ ନାଶାୟ ଵିଶଂତି ଲୋକାସ୍ତଵାପି ଵକ୍ତ୍ରାଣି ସମୃଦ୍ଧଵେଗାଃ ॥ 29 ॥

ଲେଲିହ୍ୟସେ ଗ୍ରସମାନଃ ସମଂତାଲ୍ଲୋକାନ୍ସମଗ୍ରାନ୍ଵଦନୈର୍ଜ୍ଵଲଦ୍ଭିଃ।
ତେଜୋଭିରାପୂର୍ୟ ଜଗତ୍ସମଗ୍ରଂ ଭାସସ୍ତଵୋଗ୍ରାଃ ପ୍ରତପଂତି ଵିଷ୍ଣୋ ॥ 30 ॥

ଆଖ୍ୟାହି ମେ କୋ ଭଵାନୁଗ୍ରରୂପୋ ନମୋଽସ୍ତୁ ତେ ଦେଵଵର ପ୍ରସୀଦ।
ଵିଜ୍ଞାତୁମିଚ୍ଛାମି ଭଵଂତମାଦ୍ୟଂ ନ ହି ପ୍ରଜାନାମି ତଵ ପ୍ରଵୃତ୍ତିମ୍ ॥ 31 ॥

ଶ୍ରୀଭଗଵାନୁଵାଚ ।
କାଲୋଽସ୍ମି ଲୋକକ୍ଷୟକୃତ୍ପ୍ରଵୃଦ୍ଧୋ ଲୋକାନ୍ସମାହର୍ତୁମିହ ପ୍ରଵୃତ୍ତଃ।
ଋତେଽପି ତ୍ଵାଂ ନ ଭଵିଷ୍ୟଂତି ସର୍ଵେ ୟେଽଵସ୍ଥିତାଃ ପ୍ରତ୍ୟନୀକେଷୁ ୟୋଧାଃ ॥ 32 ॥

ତସ୍ମାତ୍ତ୍ଵମୁତ୍ତିଷ୍ଠ ୟଶୋ ଲଭସ୍ଵ ଜିତ୍ଵା ଶତ୍ରୂନ୍ଭୁଂକ୍ଷ୍ଵ ରାଜ୍ୟଂ ସମୃଦ୍ଧମ୍।
ମୟୈଵୈତେ ନିହତାଃ ପୂର୍ଵମେଵ ନିମିତ୍ତମାତ୍ରଂ ଭଵ ସଵ୍ୟସାଚିନ୍ ॥ 33 ॥

ଦ୍ରୋଣଂ ଚ ଭୀଷ୍ମଂ ଚ ଜୟଦ୍ରଥଂ ଚ କର୍ଣଂ ତଥାନ୍ୟାନପି ୟୋଧଵୀରାନ୍।
ମୟା ହତାଂସ୍ତ୍ଵଂ ଜହି ମା ଵ୍ୟଥିଷ୍ଠା ୟୁଧ୍ୟସ୍ଵ ଜେତାସି ରଣେ ସପତ୍ନାନ୍ ॥ 34 ॥

ସଂଜୟ ଉଵାଚ ।
ଏତଚ୍ଛ୍ରୁତ୍ଵା ଵଚନଂ କେଶଵସ୍ୟ କୃତାଂଜଲିର୍ଵେପମାନଃ କିରୀଟୀ।
ନମସ୍କୃତ୍ଵା ଭୂୟ ଏଵାହ କୃଷ୍ଣଂ ସଗଦ୍ଗଦଂ ଭୀତଭୀତଃ ପ୍ରଣମ୍ୟ ॥ 35 ॥

ଅର୍ଜୁନ ଉଵାଚ ।
ସ୍ଥାନେ ହୃଷୀକେଶ ତଵ ପ୍ରକୀର୍ତ୍ୟା ଜଗତ୍ପ୍ରହୃଷ୍ୟତ୍ୟନୁରଜ୍ୟତେ ଚ।
ରକ୍ଷାଂସି ଭୀତାନି ଦିଶୋ ଦ୍ରଵଂତି ସର୍ଵେ ନମସ୍ୟଂତି ଚ ସିଦ୍ଧସଂଘାଃ ॥ 36 ॥

କସ୍ମାଚ୍ଚ ତେ ନ ନମେରନ୍ମହାତ୍ମନ୍ଗରୀୟସେ ବ୍ରହ୍ମଣୋଽପ୍ୟାଦିକର୍ତ୍ରେ।
ଅନଂତ ଦେଵେଶ ଜଗନ୍ନିଵାସ ତ୍ଵମକ୍ଷରଂ ସଦସତ୍ତତ୍ପରଂ ୟତ୍ ॥ 37 ॥

ତ୍ଵମାଦିଦେଵଃ ପୁରୁଷଃ ପୁରାଣସ୍ତ୍ଵମସ୍ୟ ଵିଶ୍ଵସ୍ୟ ପରଂ ନିଧାନମ୍।
ଵେତ୍ତାସି ଵେଦ୍ୟଂ ଚ ପରଂ ଚ ଧାମ ତ୍ଵୟା ତତଂ ଵିଶ୍ଵମନଂତରୂପ ॥ 38 ॥

ଵାୟୁର୍ୟମୋଽଗ୍ନିର୍ଵରୁଣଃ ଶଶାଂକଃ ପ୍ରଜାପତିସ୍ତ୍ଵଂ ପ୍ରପିତାମହଶ୍ଚ।
ନମୋ ନମସ୍ତେଽସ୍ତୁ ସହସ୍ରକୃତ୍ଵଃ ପୁନଶ୍ଚ ଭୂୟୋଽପି ନମୋ ନମସ୍ତେ ॥ 39 ॥

ନମଃ ପୁରସ୍ତାଦଥ ପୃଷ୍ଠତସ୍ତେ ନମୋଽସ୍ତୁ ତେ ସର୍ଵତ ଏଵ ସର୍ଵ।
ଅନଂତଵୀର୍ୟାମିତଵିକ୍ରମସ୍ତ୍ଵଂ ସର୍ଵଂ ସମାପ୍ନୋଷି ତତୋଽସି ସର୍ଵଃ ॥ 40 ॥

ସଖେତି ମତ୍ଵା ପ୍ରସଭଂ ୟଦୁକ୍ତଂ ହେ କୃଷ୍ଣ ହେ ୟାଦଵ ହେ ସଖେତି।
ଅଜାନତା ମହିମାନଂ ତଵେଦଂ ମୟା ପ୍ରମାଦାତ୍ପ୍ରଣୟେନ ଵାପି ॥ 41 ॥

ୟଚ୍ଚାଵହାସାର୍ଥମସତ୍କୃତୋଽସି ଵିହାରଶୟ୍ୟାସନଭୋଜନେଷୁ।
ଏକୋଽଥଵାପ୍ୟଚ୍ୟୁତ ତତ୍ସମକ୍ଷଂ ତତ୍କ୍ଷାମୟେ ତ୍ଵାମହମପ୍ରମେୟମ୍ ॥ 42 ॥

ପିତାସି ଲୋକସ୍ୟ ଚରାଚରସ୍ୟ ତ୍ଵମସ୍ୟ ପୂଜ୍ୟଶ୍ଚ ଗୁରୁର୍ଗରୀୟାନ୍।
ନ ତ୍ଵତ୍ସମୋଽସ୍ତ୍ୟଭ୍ୟଧିକଃ କୁତୋଽନ୍ୟୋ ଲୋକତ୍ରୟେଽପ୍ୟପ୍ରତିମପ୍ରଭାଵ ॥ 43 ॥

ତସ୍ମାତ୍ପ୍ରଣମ୍ୟ ପ୍ରଣିଧାୟ କାୟଂ ପ୍ରସାଦୟେ ତ୍ଵାମହମୀଶମୀଡ୍ୟମ୍।
ପିତେଵ ପୁତ୍ରସ୍ୟ ସଖେଵ ସଖ୍ୟୁଃ ପ୍ରିୟଃ ପ୍ରିୟାୟାର୍ହସି ଦେଵ ସୋଢୁମ୍ ॥ 44 ॥

ଅଦୃଷ୍ଟପୂର୍ଵଂ ହୃଷିତୋଽସ୍ମି ଦୃଷ୍ଟ୍ଵା ଭୟେନ ଚ ପ୍ରଵ୍ୟଥିତଂ ମନୋ ମେ।
ତଦେଵ ମେ ଦର୍ଶୟ ଦେଵରୂପଂ ପ୍ରସୀଦ ଦେଵେଶ ଜଗନ୍ନିଵାସ ॥ 45 ॥

କିରୀଟିନଂ ଗଦିନଂ ଚକ୍ରହସ୍ତମିଚ୍ଛାମି ତ୍ଵାଂ ଦ୍ରଷ୍ଟୁମହଂ ତଥୈଵ।
ତେନୈଵ ରୂପେଣ ଚତୁର୍ଭୁଜେନ ସହସ୍ରବାହୋ ଭଵ ଵିଶ୍ଵମୂର୍ତେ ॥ 46 ॥

ଶ୍ରୀଭଗଵାନୁଵାଚ ।
ମୟା ପ୍ରସନ୍ନେନ ତଵାର୍ଜୁନେଦଂ ରୂପଂ ପରଂ ଦର୍ଶିତମାତ୍ମୟୋଗାତ୍।
ତେଜୋମୟଂ ଵିଶ୍ଵମନଂତମାଦ୍ୟଂ ୟନ୍ମେ ତ୍ଵଦନ୍ୟେନ ନ ଦୃଷ୍ଟପୂର୍ଵମ୍ ॥ 47 ॥

ନ ଵେଦୟଜ୍ଞାଧ୍ୟୟନୈର୍ନ ଦାନୈର୍ନ ଚ କ୍ରିୟାଭିର୍ନ ତପୋଭିରୁଗ୍ରୈଃ।
ଏଵଂରୂପଃ ଶକ୍ୟ ଅହଂ ନୃଲୋକେ ଦ୍ରଷ୍ଟୁଂ ତ୍ଵଦନ୍ୟେନ କୁରୁପ୍ରଵୀର ॥ 48 ॥

ମା ତେ ଵ୍ୟଥା ମା ଚ ଵିମୂଢଭାଵୋ ଦୃଷ୍ଟ୍ଵା ରୂପଂ ଘୋରମୀଦୃଙ୍ମମେଦମ୍।
ଵ୍ୟପେତଭୀଃ ପ୍ରୀତମନାଃ ପୁନସ୍ତ୍ଵଂ ତଦେଵ ମେ ରୂପମିଦଂ ପ୍ରପଶ୍ୟ ॥ 49 ॥

ସଂଜୟ ଉଵାଚ ।
ଇତ୍ୟର୍ଜୁନଂ ଵାସୁଦେଵସ୍ତଥୋକ୍ତ୍ଵା ସ୍ଵକଂ ରୂପଂ ଦର୍ଶୟାମାସ ଭୂୟଃ।
ଆଶ୍ଵାସୟାମାସ ଚ ଭୀତମେନଂ ଭୂତ୍ଵା ପୁନଃ ସୌମ୍ୟଵପୁର୍ମହାତ୍ମା ॥ 50 ॥

ଅର୍ଜୁନ ଉଵାଚ ।
ଦୃଷ୍ଟ୍ଵେଦଂ ମାନୁଷଂ ରୂପଂ ତଵ ସୌମ୍ୟଂ ଜନାର୍ଦନ ।
ଇଦାନୀମସ୍ମି ସଂଵୃତ୍ତଃ ସଚେତାଃ ପ୍ରକୃତିଂ ଗତଃ ॥ 51 ॥

ଶ୍ରୀଭଗଵାନୁଵାଚ ।
ସୁଦୁର୍ଦର୍ଶମିଦଂ ରୂପଂ ଦୃଷ୍ଟଵାନସି ୟନ୍ମମ ।
ଦେଵା ଅପ୍ୟସ୍ୟ ରୂପସ୍ୟ ନିତ୍ୟଂ ଦର୍ଶନକାଂକ୍ଷିଣଃ ॥ 52 ॥

ନାହଂ ଵେଦୈର୍ନ ତପସା ନ ଦାନେନ ନ ଚେଜ୍ୟୟା ।
ଶକ୍ୟ ଏଵଂଵିଧୋ ଦ୍ରଷ୍ଟୁଂ ଦୃଷ୍ଟଵାନସି ମାଂ ୟଥା ॥ 53 ॥

ଭକ୍ତ୍ୟା ତ୍ଵନନ୍ୟୟା ଶକ୍ୟ ଅହମେଵଂଵିଧୋଽର୍ଜୁନ ।
ଜ୍ଞାତୁଂ ଦ୍ରଷ୍ଟୁଂ ଚ ତତ୍ତ୍ଵେନ ପ୍ରଵେଷ୍ଟୁଂ ଚ ପରଂତପ ॥ 54 ॥

ମତ୍କର୍ମକୃନ୍ମତ୍ପରମୋ ମଦ୍ଭକ୍ତଃ ସଂଗଵର୍ଜିତଃ ।
ନିର୍ଵୈରଃ ସର୍ଵଭୂତେଷୁ ୟଃ ସ ମାମେତି ପାଂଡଵ ॥ 55 ॥

ଓଂ ତତ୍ସଦିତି ଶ୍ରୀମଦ୍ଭଗଵଦ୍ଗୀତାସୂପନିଷତ୍ସୁ ବ୍ରହ୍ମଵିଦ୍ୟାୟାଂ ୟୋଗଶାସ୍ତ୍ରେ ଶ୍ରୀକୃଷ୍ଣାର୍ଜୁନସଂଵାଦେ

ଵିଶ୍ଵରୂପଦର୍ଶନୟୋଗୋ ନାମୈକାଦଶୋଽଧ୍ୟାୟଃ ॥11 ॥

********

Leave a Comment