Chanakya Neeti Chapter 2 Lyrics In Oriya/Odia
ଅନୃତଂ ସାହସଂ ମାୟା ମୂର୍ଖତ୍ଵମତିଲୋଭିତା ।
ଅଶୌଚତ୍ଵଂ ନିର୍ଦୟତ୍ଵଂ ସ୍ତ୍ରୀଣାଂ ଦୋଷାଃ ସ୍ଵଭାଵଜାଃ ॥ 01 ॥
ଭୋଜ୍ୟଂ ଭୋଜନଶକ୍ତିଶ୍ଚ ରତିଶକ୍ତିର୍ଵରାଂଗନା ।
ଵିଭଵୋ ଦାନଶକ୍ତିଶ୍ଚ ନାଲ୍ପସ୍ୟ ତପସଃ ଫଲମ୍ ॥ 02 ॥
ୟସ୍ୟ ପୁତ୍ରୋ ଵଶୀଭୂତୋ ଭାର୍ୟା ଛଂଦାନୁଗାମିନୀ ।
ଵିଭଵେ ୟଶ୍ଚ ସଂତୁଷ୍ଟସ୍ତସ୍ୟ ସ୍ଵର୍ଗ ଇହୈଵ ହି ॥ 03 ॥
ତେ ପୁତ୍ରା ୟେ ପିତୁର୍ଭକ୍ତାଃ ସ ପିତା ୟସ୍ତୁ ପୋଷକଃ ।
ତନ୍ମିତ୍ରଂ ୟତ୍ର ଵିଶ୍ଵାସଃ ସା ଭାର୍ୟା ୟତ୍ର ନିର୍ଵୃତିଃ ॥ 04 ॥
ପରୋକ୍ଷେ କାର୍ୟହଂତାରଂ ପ୍ରତ୍ୟକ୍ଷେ ପ୍ରିୟଵାଦିନମ୍ ।
ଵର୍ଜୟେତ୍ତାଦୃଶଂ ମିତ୍ରଂ ଵିଷକୁଂଭଂ ପୟୋମୁଖମ୍ ॥ 05 ॥
ନ ଵିଶ୍ଵସେତ୍କୁମିତ୍ରେ ଚ ମିତ୍ରେ ଚାପି ନ ଵିଶ୍ଵସେତ୍ ।
କଦାଚିତ୍କୁପିତଂ ମିତ୍ରଂ ସର୍ଵଂ ଗୁହ୍ୟଂ ପ୍ରକାଶୟେତ୍ ॥ 06 ॥
ମନସା ଚିଂତିତଂ କାର୍ୟଂ ଵାଚା ନୈଵ ପ୍ରକାଶୟେତ୍ ।
ମଂତ୍ରେଣ ରକ୍ଷୟେଦ୍ଗୂଢଂ କାର୍ୟେ ଚାପି ନିୟୋଜୟେତ୍ ॥ 07 ॥
କଷ୍ଟଂ ଚ ଖଲୁ ମୂର୍ଖତ୍ଵଂ କଷ୍ଟଂ ଚ ଖଲୁ ୟୌଵନମ୍ ।
କଷ୍ଟାତ୍କଷ୍ଟତରଂ ଚୈଵ ପରଗେହନିଵାସନମ୍ ॥ 08 ॥
ଶୈଲେ ଶୈଲେ ଚ ମାଣିକ୍ୟଂ ମୌକ୍ତିକଂ ନ ଗଜେ ଗଜେ ।
ସାଧଵୋ ନ ହି ସର୍ଵତ୍ର ଚଂଦନଂ ନ ଵନେ ଵନେ ॥ 09 ॥
ପୁତ୍ରାଶ୍ଚ ଵିଵିଧୈଃ ଶୀଲୈର୍ନିୟୋଜ୍ୟାଃ ସତତଂ ବୁଧୈଃ ।
ନୀତିଜ୍ଞାଃ ଶୀଲସଂପନ୍ନା ଭଵଂତି କୁଲପୂଜିତାଃ ॥ 10 ॥
ମାତା ଶତ୍ରୁଃ ପିତା ଵୈରୀ ୟାଭ୍ୟାଂ ବାଲା ନ ପାଠିତାଃ ।
ସଭାମଧ୍ୟେ ନ ଶୋଭଂତେ ହଂସମଧ୍ୟେ ବକୋ ୟଥା ॥ 11 ॥
ଲାଲନାଦ୍ବହଵୋ ଦୋଷାସ୍ତାଡନେ ବହଵୋ ଗୁଣାଃ ।
ତସ୍ମାତ୍ପୁତ୍ରଂ ଚ ଶିଷ୍ୟଂ ଚ ତାଡୟେନ୍ନ ତୁ ଲାଲୟେତ୍ ॥ 12 ॥
ଶ୍ଲୋକେନ ଵା ତଦର୍ଧେନ ତଦର୍ଧାର୍ଧାକ୍ଷରେଣ ଵା ।
ଅବଂଧ୍ୟଂ ଦିଵସଂ କୁର୍ୟାଦ୍ଦାନାଧ୍ୟୟନକର୍ମଭିଃ ॥ 13 ॥
କାଂତାଵିୟୋଗଃ ସ୍ଵଜନାପମାନଂ
ଋଣସ୍ୟ ଶେଷଂ କୁନୃପସ୍ୟ ସେଵା ।
ଦାରିଦ୍ର୍ୟଭାଵାଦ୍ଵିମୁଖଂ ଚ ମିତ୍ରଂ
ଵିନାଗ୍ନିନା ପଂଚ ଦହଂତି କାୟମ୍ ॥ 14 ॥
ନଦୀତୀରେ ଚ ୟେ ଵୃକ୍ଷାଃ ପରଗେହେଷୁ କାମିନୀ ।
ମଂତ୍ରହୀନାଶ୍ଚ ରାଜାନଃ ଶୀଘ୍ରଂ ନଶ୍ୟଂତ୍ୟସଂଶୟମ୍ ॥ 15 ॥
ବଲଂ ଵିଦ୍ୟା ଚ ଵିପ୍ରାଣାଂ ରାଜ୍ଞାଂ ସୈନ୍ୟଂ ବଲଂ ତଥା ।
ବଲଂ ଵିତ୍ତଂ ଚ ଵୈଶ୍ୟାନାଂ ଶୂଦ୍ରାଣାଂ ପାରିଚର୍ୟକମ୍ ॥ 16 ॥
ନିର୍ଧନଂ ପୁରୁଷଂ ଵେଶ୍ୟା ପ୍ରଜା ଭଗ୍ନଂ ନୃପଂ ତ୍ୟଜେତ୍ ।
ଖଗା ଵୀତଫଲଂ ଵୃକ୍ଷଂ ଭୁକ୍ତ୍ଵା ଚାଭ୍ୟାଗତୋ ଗୃହମ୍ ॥ 17 ॥
ଗୃହୀତ୍ଵା ଦକ୍ଷିଣାଂ ଵିପ୍ରାସ୍ତ୍ୟଜଂତି ୟଜମାନକମ୍ ।
ପ୍ରାପ୍ତଵିଦ୍ୟା ଗୁରୁଂ ଶିଷ୍ୟା ଦଗ୍ଧାରଣ୍ୟଂ ମୃଗାସ୍ତଥା ॥ 18 ॥
ଦୁରାଚାରୀ ଦୁରାଦୃଷ୍ଟିର୍ଦୁରାଵାସୀ ଚ ଦୁର୍ଜନଃ ।
ୟନ୍ମୈତ୍ରୀ କ୍ରିୟତେ ପୁଂଭିର୍ନରଃ ଶୀଘ୍ରଂ ଵିନଶ୍ୟତି ॥ 19 ॥
ସମାନେ ଶୋଭତେ ପ୍ରୀତିଃ ରାଜ୍ଞି ସେଵା ଚ ଶୋଭତେ ।
ଵାଣିଜ୍ୟଂ ଵ୍ୟଵହାରେଷୁ ଦିଵ୍ୟା ସ୍ତ୍ରୀ ଶୋଭତେ ଗୃହେ ॥ 20 ॥
********