[ଶ୍ରୀମଦ୍ଭଗଵଦ୍ଗୀତା] ᐈ (Chapter 7) Srimad Bhagavad Gita Lyrics In Oriya/Odia Pdf

Srimad Bhagavad Gita Chapter 7 Lyrics In Oriya/Odia

ଅଥ ସପ୍ତମୋଽଧ୍ୟାୟଃ ।

ଶ୍ରୀଭଗଵାନୁଵାଚ ।
ମୟ୍ୟାସକ୍ତମନାଃ ପାର୍ଥ ୟୋଗଂ ୟୁଂଜନ୍ମଦାଶ୍ରୟଃ ।
ଅସଂଶୟଂ ସମଗ୍ରଂ ମାଂ ୟଥା ଜ୍ଞାସ୍ୟସି ତଚ୍ଛୃଣୁ ॥ 1 ॥

ଜ୍ଞାନଂ ତେଽହଂ ସଵିଜ୍ଞାନମିଦଂ ଵକ୍ଷ୍ୟାମ୍ୟଶେଷତଃ ।
ୟଜ୍ଜ୍ଞାତ୍ଵା ନେହ ଭୂୟୋଽନ୍ୟଜ୍ଜ୍ଞାତଵ୍ୟମଵଶିଷ୍ୟତେ ॥ 2 ॥

ମନୁଷ୍ୟାଣାଂ ସହସ୍ରେଷୁ କଶ୍ଚିଦ୍ୟତତି ସିଦ୍ଧୟେ ।
ୟତତାମପି ସିଦ୍ଧାନାଂ କଶ୍ଚିନ୍ମାଂ ଵେତ୍ତି ତତ୍ତ୍ଵତଃ ॥ 3 ॥

ଭୂମିରାପୋଽନଲୋ ଵାୟୁଃ ଖଂ ମନୋ ବୁଦ୍ଧିରେଵ ଚ ।
ଅହଂକାର ଇତୀୟଂ ମେ ଭିନ୍ନା ପ୍ରକୃତିରଷ୍ଟଧା ॥ 4 ॥

ଅପରେୟମିତସ୍ତ୍ଵନ୍ୟାଂ ପ୍ରକୃତିଂ ଵିଦ୍ଧି ମେ ପରାମ୍ ।
ଜୀଵଭୂତାଂ ମହାବାହୋ ୟୟେଦଂ ଧାର୍ୟତେ ଜଗତ୍ ॥ 5 ॥

ଏତଦ୍ୟୋନୀନି ଭୂତାନି ସର୍ଵାଣୀତ୍ୟୁପଧାରୟ ।
ଅହଂ କୃତ୍ସ୍ନସ୍ୟ ଜଗତଃ ପ୍ରଭଵଃ ପ୍ରଲୟସ୍ତଥା ॥ 6 ॥

ମତ୍ତଃ ପରତରଂ ନାନ୍ୟତ୍କିଂଚିଦସ୍ତି ଧନଂଜୟ ।
ମୟି ସର୍ଵମିଦଂ ପ୍ରୋତଂ ସୂତ୍ରେ ମଣିଗଣା ଇଵ ॥ 7 ॥

ରସୋଽହମପ୍ସୁ କୌଂତେୟ ପ୍ରଭାସ୍ମି ଶଶିସୂର୍ୟୟୋଃ ।
ପ୍ରଣଵଃ ସର୍ଵଵେଦେଷୁ ଶବ୍ଦଃ ଖେ ପୌରୁଷଂ ନୃଷୁ ॥ 8 ॥

ପୁଣ୍ୟୋ ଗଂଧଃ ପୃଥିଵ୍ୟାଂ ଚ ତେଜଶ୍ଚାସ୍ମି ଵିଭାଵସୌ ।
ଜୀଵନଂ ସର୍ଵଭୂତେଷୁ ତପଶ୍ଚାସ୍ମି ତପସ୍ଵିଷୁ ॥ 9 ॥

ବୀଜଂ ମାଂ ସର୍ଵଭୂତାନାଂ ଵିଦ୍ଧି ପାର୍ଥ ସନାତନମ୍ ।
ବୁଦ୍ଧିର୍ବୁଦ୍ଧିମତାମସ୍ମି ତେଜସ୍ତେଜସ୍ଵିନାମହମ୍ ॥ 10 ॥

ବଲଂ ବଲଵତାଂ ଚାହଂ କାମରାଗଵିଵର୍ଜିତମ୍ ।
ଧର୍ମାଵିରୁଦ୍ଧୋ ଭୂତେଷୁ କାମୋଽସ୍ମି ଭରତର୍ଷଭ ॥ 11 ॥

ୟେ ଚୈଵ ସାତ୍ତ୍ଵିକା ଭାଵା ରାଜସାସ୍ତାମସାଶ୍ଚ ୟେ ।
ମତ୍ତ ଏଵେତି ତାନ୍ଵିଦ୍ଧି ନ ତ୍ଵହଂ ତେଷୁ ତେ ମୟି ॥ 12 ॥

ତ୍ରିଭିର୍ଗୁଣମୟୈର୍ଭାଵୈରେଭିଃ ସର୍ଵମିଦଂ ଜଗତ୍ ।
ମୋହିତଂ ନାଭିଜାନାତି ମାମେଭ୍ୟଃ ପରମଵ୍ୟୟମ୍ ॥ 13 ॥

ଦୈଵୀ ହ୍ୟେଷା ଗୁଣମୟୀ ମମ ମାୟା ଦୁରତ୍ୟୟା ।
ମାମେଵ ୟେ ପ୍ରପଦ୍ୟଂତେ ମାୟାମେତାଂ ତରଂତି ତେ ॥ 14 ॥

ନ ମାଂ ଦୁଷ୍କୃତିନୋ ମୂଢାଃ ପ୍ରପଦ୍ୟଂତେ ନରାଧମାଃ ।
ମାୟୟାପହୃତଜ୍ଞାନା ଆସୁରଂ ଭାଵମାଶ୍ରିତାଃ ॥ 15 ॥

ଚତୁର୍ଵିଧା ଭଜଂତେ ମାଂ ଜନାଃ ସୁକୃତିନୋଽର୍ଜୁନ ।
ଆର୍ତୋ ଜିଜ୍ଞାସୁରର୍ଥାର୍ଥୀ ଜ୍ଞାନୀ ଚ ଭରତର୍ଷଭ ॥ 16 ॥

ତେଷାଂ ଜ୍ଞାନୀ ନିତ୍ୟୟୁକ୍ତ ଏକଭକ୍ତିର୍ଵିଶିଷ୍ୟତେ ।
ପ୍ରିୟୋ ହି ଜ୍ଞାନିନୋଽତ୍ୟର୍ଥମହଂ ସ ଚ ମମ ପ୍ରିୟଃ ॥ 17 ॥

ଉଦାରାଃ ସର୍ଵ ଏଵୈତେ ଜ୍ଞାନୀ ତ୍ଵାତ୍ମୈଵ ମେ ମତମ୍ ।
ଆସ୍ଥିତଃ ସ ହି ୟୁକ୍ତାତ୍ମା ମାମେଵାନୁତ୍ତମାଂ ଗତିମ୍ ॥ 18 ॥

ବହୂନାଂ ଜନ୍ମନାମଂତେ ଜ୍ଞାନଵାନ୍ମାଂ ପ୍ରପଦ୍ୟତେ ।
ଵାସୁଦେଵଃ ସର୍ଵମିତି ସ ମହାତ୍ମା ସୁଦୁର୍ଲଭଃ ॥ 19 ॥

କାମୈସ୍ତୈସ୍ତୈର୍ହୃତଜ୍ଞାନାଃ ପ୍ରପଦ୍ୟଂତେଽନ୍ୟଦେଵତାଃ ।
ତଂ ତଂ ନିୟମମାସ୍ଥାୟ ପ୍ରକୃତ୍ୟା ନିୟତାଃ ସ୍ଵୟା ॥ 20 ॥

ୟୋ ୟୋ ୟାଂ ୟାଂ ତନୁଂ ଭକ୍ତଃ ଶ୍ରଦ୍ଧୟାର୍ଚିତୁମିଚ୍ଛତି ।
ତସ୍ୟ ତସ୍ୟାଚଲାଂ ଶ୍ରଦ୍ଧାଂ ତାମେଵ ଵିଦଧାମ୍ୟହମ୍ ॥ 21 ॥

ସ ତୟା ଶ୍ରଦ୍ଧୟା ୟୁକ୍ତସ୍ତସ୍ୟାରାଧନମୀହତେ ।
ଲଭତେ ଚ ତତଃ କାମାନ୍ମୟୈଵ ଵିହିତାନ୍ହି ତାନ୍ ॥ 22 ॥

ଅଂତଵତ୍ତୁ ଫଲଂ ତେଷାଂ ତଦ୍ଭଵତ୍ୟଲ୍ପମେଧସାମ୍ ।
ଦେଵାଂଦେଵୟଜୋ ୟାଂତି ମଦ୍ଭକ୍ତା ୟାଂତି ମାମପି ॥ 23 ॥

ଅଵ୍ୟକ୍ତଂ ଵ୍ୟକ୍ତିମାପନ୍ନଂ ମନ୍ୟଂତେ ମାମବୁଦ୍ଧୟଃ ।
ପରଂ ଭାଵମଜାନଂତୋ ମମାଵ୍ୟୟମନୁତ୍ତମମ୍ ॥ 24 ॥

ନାହଂ ପ୍ରକାଶଃ ସର୍ଵସ୍ୟ ୟୋଗମାୟାସମାଵୃତଃ ।
ମୂଢୋଽୟଂ ନାଭିଜାନାତି ଲୋକୋ ମାମଜମଵ୍ୟୟମ୍ ॥ 25 ॥

ଵେଦାହଂ ସମତୀତାନି ଵର୍ତମାନାନି ଚାର୍ଜୁନ ।
ଭଵିଷ୍ୟାଣି ଚ ଭୂତାନି ମାଂ ତୁ ଵେଦ ନ କଶ୍ଚନ ॥ 26 ॥

ଇଚ୍ଛାଦ୍ଵେଷସମୁତ୍ଥେନ ଦ୍ଵଂଦ୍ଵମୋହେନ ଭାରତ ।
ସର୍ଵଭୂତାନି ସଂମୋହଂ ସର୍ଗେ ୟାଂତି ପରଂତପ ॥ 27 ॥

ୟେଷାଂ ତ୍ଵଂତଗତଂ ପାପଂ ଜନାନାଂ ପୁଣ୍ୟକର୍ମଣାମ୍ ।
ତେ ଦ୍ଵଂଦ୍ଵମୋହନିର୍ମୁକ୍ତା ଭଜଂତେ ମାଂ ଦୃଢଵ୍ରତାଃ ॥ 28 ॥

ଜରାମରଣମୋକ୍ଷାୟ ମାମାଶ୍ରିତ୍ୟ ୟତଂତି ୟେ ।
ତେ ବ୍ରହ୍ମ ତଦ୍ଵିଦୁଃ କୃତ୍ସ୍ନମଧ୍ୟାତ୍ମଂ କର୍ମ ଚାଖିଲମ୍ ॥ 29 ॥

ସାଧିଭୂତାଧିଦୈଵଂ ମାଂ ସାଧିୟଜ୍ଞଂ ଚ ୟେ ଵିଦୁଃ ।
ପ୍ରୟାଣକାଲେଽପି ଚ ମାଂ ତେ ଵିଦୁର୍ୟୁକ୍ତଚେତସଃ ॥ 30 ॥

ଓଂ ତତ୍ସଦିତି ଶ୍ରୀମଦ୍ଭଗଵଦ୍ଗୀତାସୂପନିଷତ୍ସୁ ବ୍ରହ୍ମଵିଦ୍ୟାୟାଂ ୟୋଗଶାସ୍ତ୍ରେ ଶ୍ରୀକୃଷ୍ଣାର୍ଜୁନସଂଵାଦେ

ଜ୍ଞାନଵିଜ୍ଞାନୟୋଗୋ ନାମ ସପ୍ତମୋଽଧ୍ୟାୟଃ ॥7 ॥

********